【露營必須之聖殿 - 焚火台】

一個設置得宜嘅焚火台，足以變做你成晚嘅焦點

靜靜咁對著個火，飲住杯約翰走路，聽住木材嘅爆裂聲；
完全令你忘記平時會開嘅Netflix、電影、聽歌或者打機。
（*威士忌中文譯名中，店主R最鍾意就係約翰走路，
換成廣東話就更具餘韻LOL）

不過焚火台的確唔係人人都負擔得起，講緊嘅唔係價錢，而係重量同體積。
玩UL嘅朋友頂多帶個迷你鈦柴爐，要孭住個焚火台周圍走真係辛苦過毅行。
市面上其實都有好多款式嘅焚火台，究竟邊款焚火台先最好用？

世事無完美嘅，唔同款式嘅焚火台各有所長。今次先同大家講幾個重點。
第一點，你嘅焚火台係用嚟純焚火，定係想煮食甚至燒烤呢？
如果係前者就比較簡單，後者嘅話就要考慮焚火台可否加配煮食用嘅配置，
例如係可以平置鍋具嘅架，或者燒烤用嘅烤網。另一樣嘅考慮就係焚火嘅面積大小。
如果焚火嘅面積太細，可以煮食嘅範圍就會相對收窄。

第二點嘅係，焚火台選材嘅影響。揀鈦、鐵、定係不鏽鋼，重量當然係一大考慮。
另一樣緊要嘅係變形嘅機會，因為焚火台會長時間處於高溫狀態，太薄嘅材料用耐咗會好大機會變形，組裝嘅時候就會唔啱位裝唔實，用用吓散咗或者跌咗個煲之類就gg了。仲有，生鏽與否都係另一個經常被問到嘅問題。好多人以為不鏽鋼就唔會生鏽，其實不鏽鋼只係「比較」唔容易生鏽，喺高溫情況下倒水落去一樣會生鏽，或者晨初時分嘅露水霧水都會令佢生鏽；鈦金屬就冇生鏽嘅問題，不過受上面所講嘅情況，都會變成啡啡哋嘅顏色咁。

下次就會重點同大家分享下焚火台生火同用火嘅唔同實況比較。

#森淼山具社 #露營美學 #重裝露營 #焚火台 #柴爐 #火箭爐 #露火爐
#焚火 #柴火 #炭火